恥笑朋友系列2

[annonymous denominator]

以前中學同朋友踢開波，跟學校足球隊踢，我哋學校唔注重體育，所以都係玩玩下，連波衫都係比賽前訂。

話說我朋友係負責訂波衫嗰個，正常係設計完搵廠商自己印，我朋友嫌麻煩，是但上網訂咗幾件廉價波衫，個阿Sir又戇居居冇理佢。

咁比賽前收到新衫梗係洗洗先，仆街！件野甩色，洗完個數字幾乎唔見埋，到咗第日又差唔多大半隊人都洗咗件波衫，冇數字，原本就冇得比賽，但經過阿Sir同裁判據理力爭，仲有少少顏色見到，個裁判又唔想煩，於是俾我哋踢。

結果場上面幾條友同一件衫，冇數字，對面個教練淨係可以話，mark住嗰條友，嗰條友呀！搞完一輪對面隊踢到崩潰。

重點係我哋隊連龍門嗰件波衫都係一樣，中途第二條友用手評判當咗佢係龍門，對面隊拗又吹我哋唔漲，我哋個阿sir匿埋咗一邊笑，笑到仆街。